၂၀၁၂ ဖေဖော်ဝါရီ ၁၄ ရက်နေ့တွင် အမေရိကန် နယူးဂျာစီပြည်နယ် ပရင်စတန်တက္ကသိုလ်အနီးရှိ ကမ္ဘာ့အကြီးဆုံး ပုဂ္ဂလိက စာမေးပွဲစစ်ဌာန Educational Testing Service (ETS) က တရုတ်ကျောင်းသားတွေ TOEFL (Test of English as a Foreign Language ဖြေဆိုမှု အရေအတွက် အလွန်များပြားလာကြောင်း ကြေငြာခဲ့သည်။
၁၉၈၁ ခုနှစ်တွင် တရုတ်အစိုးရနှင့် ETS တို့ သဘောတူစာချုပ်ရေးထိုးခဲ့ပြီး၊ ပေကျင်းနှင့် ရှန်ဟိုင်းတွင်TOEFL စာမေးပွဲ စင်တာသုံးခု စတင်ဖွင့်ခဲ့သည်။ ခြောက်လအကြာမှာ ကျောင်းသား ၁၆၁ ဦး ဖြေဆိုခဲ့သည်။ ယခု TOEFL စာမွေးပွဲ ဖြေဆိုခဲ့သူ တရုတ်ကျောင်းသား ၃သန်းကျော် ရှိပြီဟု ETS က ဖော်ပြထားသည်။ ၂၀၁၀ နှင့် ၂၀၁၁ ကြားတွင် TOFEL ဖြေဆိုသူ တရုတ်ကျောင်းသား ၁၉ ရာခိုင်နှုန်း တိုးများခဲ့ပြီး၊ ၂၀၁၂ ခုနှစ်တွင်လည်း အရေအတွက် ဒီထက် တိုးများဦးမည်ဟု ဆိုသည်။
“၂၀၀၂ ခုနှစ်မှာ အမေရိကသွား ပညာသင်ဖို့ စလျှောက်ခဲ့တာပါ။ အဲဒီအချိန်တုန်းက ကျနော်တို့ စင်ဝှာ တက္ကသိုလ်က ကျောင်းသားတိုင်း နိုင်ငံခြားမှာ ပညာသင်ဖို့ အင်္ဂလိပ်စာ လေ့လာကြတယ်။ နိုင်ငံခြားမှာလေ့လာတာ ကျနော်တို့ရဲ့ အသိအမြင် မိုးကုပ်စက်ဝိုင်း ပိုကျယ်စေတယ်။ ပညာရော အသက်မွေးဝမ်းကျောင်းအတွက်ပါ အခွင့်အလမ်းတွေ ရစေတာပေါ့” ဟု TOEFL နှင့် GRE စာမေးပွဲ နှစ်ခုစလုံး အမှတ်ကောင်းကောင်း ရရှိခဲ့သူ Zhou Ye က ပြောပြသည်။
ယခု Zhou Ye က စင်္ကာပူနှင့် ဟောင်ကောင်ရှိ Softbank China Venture Capital (SBCVC) ရင်းနှီးမြှုပ်နှံမှုလုပ်ငန်း ရုံးချုပ်နှစ်ခုရဲ့ ဒါရိုက်တာဖြစ်သည်။ သူက ပေကျင်းရှိ စင်ဝှာတက္ကသိုလ်မှ ထူးချွန်တဲ့ ကျောင်းသားဖြစ်သည်။ ၂၀၀၃ ခုနှစ်မှာ စင်ဝှာက လျှပ်စစ်အင်ဂျင်နီယာဘွဲ့ ရရှိခဲ့ပြီး၊ ကာလီဖောနီယား ဘာကလေတက္ကသိုလ် လျှပ်စစ်အင်ဂျင်နီယာနှင့် ကွန်ပျူတာသိပ္ပံဌာနမှာ Ph.D စကော်လားရှစ်အပြည့်ဖြင့် ၀င်ခွင့်ရခဲ့သည်။ ၂၀၀၈ ခုနှစ်မှာ Ph.D ဘွဲ့ရပြီးနောက် သူဇာတိ ရှန်ဟိုင်းကို ပြန်ပြီး အလုပ် လုပ်ခဲ့သည်။
“အမေရိကမှာ ပညာသင်ရတဲ့ အတွေ့အကြုံက ကျနော့်ရဲ့ အကယ်ဒမစ် အဆင့်အတန်း မြှင့်ပေးရုံတင်မကဘူး၊ ပြဿနာ ဖြေရှင်းနည်းနဲ့ ပေါင်းသင်းဆက်ဆံရေးပါ တိုးတက်လာတယ်။ ဘာကလေတက္ကသိုလ်က အဆင့်မြင့် ဓာတ်ခွဲခန်းတွေမှာ သုတေသနတွေ အများကြီး လုပ်ခဲ့ရတယ်။ နောက် ယဉ်ကျေးမှုပေါင်းစုံ လူမျိုးပေါင်းစုံနဲ့ သုတေနတွေ ပူးပေါင်းလုပ်ရတာ ဘယ်တော့မှ မမေ့နိုင်တဲ့ အတွေ့အကြုံတွေပါ” ဟု Zhou က ပြောပြသည်။
၂၀၁၀ ခုနှစ် တရုတ်အစိုးရ မီဒီယာက လုပ်တဲ့ စစ်တမ်းမှာ၊ တရုတ်ကျောင်းသားတွေအနက် ၅၉.၆ ရာခိုင်နှုန်းက နိုင်ငံရပ်ခြားမှာ ပညာထပ်သင်ဖို့ ကြိုးစားနေတယ်လို့ ဖော်ပြထားပါတယ်။
တရုတ်ပညာရေးဝန်ကြီးဌာန ဖော်ပြချက်အရ ၂၀၁၁ ခုနှစ်တွင် နိုင်ငံခြားထွက် အဆင့်မြင့် ပညာသင်သော ကျောင်းသားအရေအတွက်မှာ ၃၃၉၇၀၀ ရှိပြီး၊ ၂၀၁၀ ခုနှစ်ကထက် ၁၉.၃၂ ရာခိုင်နှုန်း တိုးမြင့်ခဲ့သည်။
နန်ကျင်းတက္ကသိုလ်တွင် TOEFL စာမေးပွဲဖြေဆိုဖို့ တန်းစီနေသော ကျောင်းသားများ
နိုင်ငံရပ်ခြားတွင် ပညာသင်ယူပြီး ပြန်တော်ပြန်ခဲ့သည့် ကျောင်းသားအရေအတွက်မှာလည်း များပြားလာသည်။ တရုတ် ပညာရေး ၀န်ကြီးဌာနစာရင်းအရ ၂၀၁၁ ခုနှစ်တွင် တရုတ်ကျောင်းသား ၁၈၆၂၀၀ ဦး ပြန်တော်ပြန်ခဲ့သည်။ နိုင်ငံခြား ထွက်သော စုစုပေါင်း ကျောင်းသားအရေအတွက်ရဲ့ ၅၄.၈ ရာခိုင်နှုန်း ပြန်လာခြင်းဖြစ်သည်။ ၂၀၁၀ ခုနှစ်မှာ ပြန်လာသော ကျောင်းသားအရေအတွက် ၃၈.၀၈ ရာခိုင်နှုန်းနှင့် နှိုင်းယှဉ်ရင် တိုးများလာခဲ့သည်။
ဝင့်ထန်း
No comments:
Post a Comment